Deuteronomy 34
1ⲙⲱⲩⲥⲏⲥ ⲇⲉ ⲁϥⲡⲱⲧ ⲉϩⲣⲁⲓ ⲉϫⲛ ⲁⲣⲁⲙⲱⲑ ⲛⲧⲉ ⲙⲱⲁⲃ ⲉϫⲛ ⲡⲧⲟⲟⲩ ⲛⲁⲃⲁⲩ ⲉϫⲛ ⲡⲕⲟⲟϩ ⲛⲫⲁⲥⲅⲁ ⲉⲧⲛⲡⲉⲙⲧⲟ ⲉⲃⲟⲗ ⲛϩⲓⲉⲣⲓⲭⲱ ⲁⲩⲱ ⲡϫⲟⲉⲓⲥ ⲁϥⲧⲟⲩⲟϥ ⲉⲡⲕⲁϩ ⲧⲏⲣϥ ⲛⲅⲁⲗⲁⲁⲇ ϣⲁϩⲣⲁⲓ ⲉⲇⲁⲛ 2ⲁⲩⲱ ⲡⲕⲁϩ ⲧⲏⲣϥ ⲛⲛⲉⲡⲑⲁⲗⲉⲓⲙ ⲙⲛ ⲡⲕⲁϩ ⲛⲉⲫⲣⲁⲓⲙ ⲙⲛ ⲙⲁⲛⲁⲥⲥⲏ ⲁⲩⲱ ⲡⲕⲁϩ ⲧⲏⲣϥ ⲛⲓⲟⲩⲇⲁ ϣⲁ ⲧⲉⲑⲁⲗⲗⲁⲥⲁ ⲛϩⲁⲏ 3ⲛⲙ ⲧⲉⲣⲏⲙⲟⲥ ⲙⲛ ⲡⲕⲱⲧⲉ ⲛϩⲓⲉⲣⲓⲭⲱ ⲧⲡⲟⲗⲓⲥ ⲛⲣⲣⲙ ⲛⲧⲉⲫⲟⲓⲛⲓⲕⲏ ϣⲁϩⲣⲁⲓ ⲉⲥⲏⲅⲱⲣ 4ⲡⲉϫⲉⲡϫⲟⲉⲓⲥ ⲇⲉ ⲙⲙⲱⲩⲥⲏⲥ ϫⲉ ⲡⲁⲓ ⲡⲉ ⲕⲁϩ ⲉⲛⲧⲁⲓⲱⲣⲕ ⲉⲧⲃⲏⲏⲧϥ ⲛⲁⲃⲣⲁϩⲁⲙ ⲙⲛ ⲓⲥⲁⲕ ⲙⲛ ⲓⲁⲕⲱⲃ ⲉⲓϫⲱ ⲙⲙⲟⲥ ⲛⲁⲩ ϫⲉ ϯⲛⲁⲧⲁⲁϥ ⲙⲡⲉⲧⲛⲥⲡⲉⲣⲙⲁ ⲁⲓⲧⲣⲉⲛⲉⲕⲃⲁⲗ ⲛⲁⲩ ⲉⲣⲟϥ ⲛⲅⲛⲁⲃⲱⲕ ⲇⲉ ⲉϩⲟⲩⲛ ⲉⲣⲟϥ ⲁⲛ 5ⲁⲩⲱ ⲁϥⲙⲟⲩ ϩⲛ ⲡⲙⲁ ⲉⲧⲙⲙⲁⲩ ⲛϭⲓ ⲙⲱⲩⲥⲏⲥ ⲡϩⲙϩⲁⲗ ⲛⲡϫⲟⲉⲓⲥ ϩⲛ ⲡⲕⲁϩ ⲙⲙⲱⲁⲃ ϩⲓⲧⲛ ⲡϣⲁϫⲉ ⲛⲡϫⲟⲉⲓⲥ 6ⲁⲩⲱ ⲁⲩⲧⲟⲙⲥϥ ϩⲛ ⲅⲁⲓ ϩⲓⲧⲟⲩⲛ ⲡⲏⲓ ⲙⲫⲟⲅⲱⲣ ⲁⲩⲱ ⲙⲛⲗⲁⲁⲩ ⲥⲟⲟⲩⲛ ⲛⲧⲉϥⲕⲁⲓⲥⲉ ϣⲁϩⲣⲁⲓ ⲉⲡⲟⲟⲩ 7ⲙⲱⲩⲥⲏⲥ ⲇⲉ ⲛⲉϥϩⲛϣⲉ ϫⲟⲩⲱⲧⲉ ⲛⲣⲟⲙⲡⲉ ⲛⲧⲉⲣⲉϥⲙⲟⲩ ⲁⲩⲱ ⲛⲉϥⲃⲁⲗ ⲙⲡⲟⲩⲣϩⲗⲟⲥⲧⲛ ⲟⲩⲧⲉ ⲙⲡⲟⲩⲧⲁⲕⲟ 8ⲁⲩⲱ ⲛϣⲏⲣⲉ ⲙⲡⲓ︤ⲏ︦ⲗ︥ ⲁⲩⲣⲓⲙⲉ ⲙⲙⲱⲩⲥⲏⲥ ϩⲛ ⲁⲣⲁⲃⲱⲑ ⲛⲧⲉ ⲙⲱⲁⲃ ϩⲓϫⲛ ⲡⲓⲟⲣⲇⲁⲛⲏⲥ ⲙⲡⲉⲙⲧⲟ ⲉⲃⲟⲗ ⲛϩⲓⲉⲣⲓⲭⲱ ⲙⲁⲁⲃ ⲛϩⲟⲟⲩ ⲛⲧⲉⲣⲟⲩϫⲱⲕ ⲇⲉ ⲉⲃⲟⲗ ⲛϭⲓ ⲛⲉϩⲟⲟⲩ ⲙⲫⲏⲃⲉ ⲙⲛ ⲡⲣⲓⲙⲉ ⲙⲙⲱⲩⲥⲏⲥ, 9ⲁⲩⲱ ⲓⲏⲥⲟⲩⲥ ⲡϣⲏⲣⲉ ⲛⲛⲁⲩⲏ ⲁϥⲙⲟⲩϩ ⲙⲡ︤ⲛ︦ⲁ︥ ⲙⲙⲛⲧⲣⲙⲛϩⲏⲧ ⲁⲙⲱⲩⲥⲏⲥ ⲅⲁⲣ ⲕⲁⲧⲟⲟⲧϥ ϩⲓϫⲱϥ ⲁⲩⲱ ⲁⲩⲥⲱⲧⲙ ⲛⲥⲱϥ ⲛϭⲓ ⲛϣⲏⲣⲉ ⲙⲡⲓ︤ⲏ︦ⲗ︥ ⲉⲁⲩⲉⲓⲣⲉ ⲕⲁⲧⲁ ⲑⲉ ⲉⲛⲧⲁⲡϫⲟⲉⲓⲥ ϩⲱⲛ ⲉⲧⲟⲟⲧϥ ⲙⲙⲱⲩⲥⲏⲥ 10ⲁⲩⲱ ⲙⲡⲉⲕⲉⲡⲣⲟⲫⲏⲧⲏⲥ ⲧⲱⲟⲩⲛ ϩⲙ ⲡⲓ︤ⲏ︦ⲗ︥ ⲛⲑⲉ ⲙⲙⲱⲩⲥⲏⲥ ⲉⲁⲡϫⲟⲉⲓⲥ ⲥⲟⲩⲱⲛϥ ⲛϩⲟ ϩⲓϩⲟ 11ϩⲛ ϩⲉⲛⲙⲁⲉⲓⲛ ⲧⲏⲣⲟⲩ ⲙⲛ ϩⲉⲛϣⲡⲏⲣⲉ ⲡⲁⲓ ⲉⲛⲧⲁⲡϫⲟⲉⲓⲥ ϫⲟⲟⲩϥ ⲉⲧⲣⲉϥⲁⲁⲩ ϩⲛ ⲡⲕⲁϩ ⲛⲕⲏⲙⲉ ϩⲛ ⲫⲁⲣⲁⲱ ⲙⲛ ⲛⲉϥϩⲙϩⲁⲗ ⲧⲏⲣⲟⲩ ⲙⲛ ⲡⲉϥⲕⲁϩ 12ⲛⲛⲟϭ ⲛϣⲡⲏⲣⲉ ⲁⲩⲱ ⲧϭⲓϫ ⲉⲧϫⲟⲟⲣ ⲉⲛⲧⲁⲙⲱⲩⲥⲏⲥ ⲁⲁⲩ ⲙⲡⲉⲙⲧⲟ ⲉⲃⲟⲗ ⲙⲡⲓ︤ⲏ︦ⲗ ⲧⲏⲣϥ
Copyright information for
CopSahBible2